最近壹傳媒的蘋果動新聞開始了動專輯,其中的論壇channel 曾講過了廣州花園酒店Rap、很黃很暴力,第三集的主題是“陳奕迅好心辦壞事”。
歌手陳奕迅說要為創作人成立「創作人工會」,究竟成立工會是創作人的福音,還是演藝行業發展的絆腳石?
當日的嘉賓主持是西貢區民選區議員何民傑。
他說了很多精句,令我很想記下來:
一個我咁尊崇o既歌手,就o係呢個咁隆重o既場合,去話要搞個創作人工會,我就要好唔客氣咁對佢講,佢真係諗歪腦喇……
事實上工會呢一樣咁o既組織,o係現代社會只會好心做壞事,幫唔到想幫o既人,就往往搞喎個行業。
工會根本就係上個世紀,工業革命初期,兩個世紀前o既o野……
其實唔好聽講句,同黑社會冇分別o既,只不過佢唔係動刀動槍。
而在1月18日的蘋果日報,則有以下三篇文章:
何民傑:搞工會趕絕年輕人
袁彌明:Eason 應搞乜 ?
高明輝:陳奕迅應反TVB 壟斷
陳奕迅那番相關的話只得短短廿多秒(請由01’20″看),他入行這麼來年,一直不忘幕後音樂人的貢獻,我不認為他在這麼“隆重的場合”說這些話是“諗歪腦”。
從紮鐵工人事件,甚至空姐工潮,令我覺得工會並不是何民傑說的是“黑社會”;而主持高明輝、嘉賓主持何民傑及嘉賓袁彌明將矛頭轉向TVB壟斷,反像借陳奕迅“過橋”多一點。
陳奕迅說音樂人(不是只是說藝人/歌手)不夠時間綵緋,薪水不夠,那麼,是否只要TVB不壟斷就可以解決這些問題?
Anyway,當聽到何民傑說“工會同黑社會冇分別o既”這句話,我實在大大的嚇了一跳!
各大工會是否可以要求何民傑道歉?
相關資料:
何民傑的BLOG
何民傑的的電郵:rhoffice_raymond@yahoo.com.hk
延伸閱讀:遊牧視野:誰諗歪腦?
何民傑所指既, 只係一部份行為不當既工會. (我相信係咁卦?)
其實有好多工會既行為都係過份為會員爭取權益, 好多時原因係果幾個工會代表既人工就係從每一個工人既薪金既一部份收集返黎. 所以工會有事無事都要不停咁要求公司加工人既薪金.
拉埋TVB黎講就真係”搵黎講”既. 最多咪話商台?
最主要係歌手同唱片公司之間既問題. 其實都唔需要工會, 因為經理人就係應該做緊呢樣野, 去協調藝人既時間分配同埋薪金.
回應何民傑既說話: 我從來都唔覺得頒獎禮有幾隆重? 😛 閣下尊崇又如何? 就會身家升價十倍? 而且呢句咁樣講, 唔係唔客氣, 係好過份先岩.
陳生又諗到乜就講乜, 無清楚咁表達自己既意思, 又俾人乘虛而入啦~ 唉.
蛋治,
我只是根據那個網上節目如實報道,我不見何民傑說過他指的是一部份工會,反見他口口聲聲說甚麼“事實上工會呢一樣咁o既組織,o係現代社會只會好心做壞事”,說得多麼肯定明確!
我覺得Eason 說的是音樂人的問題,指的應是幕後的製作人,而不是藝人歌手,所以不關經理人的事。
其實,我覺得這話題是可以用作討論,但看畢整個節目及相關文章,他們所說的實在頗為偏頻,就算我不是任何工會的成員,都覺得好有問題!
工會都係為一眾同行爭取合理權益。不過咁,香港唔少「工會」都係冇牙力,靠佢死得。
我因為係公司既時候睇呢篇文, 只係睇左EASON果一段, 無睇度何民傑果段. 佢咁講, 真係好大問題.
我反而覺得Eason有種係度申, 埋怨佢既行程排得太密, 無時間去準備. 不過佢真正講緊乜, 要佢先知.
無錯, 改善藝人行業既待遇絕對值得討論. 我都同意呢個咁既節目係為左收視而作出過份既言論. 雖然我係多倫多飽受不良工會既影響, 但係我都認同咁樣無根據地全面指摘工會係好有問題.
(另, 我係海外, 睇唔到果幾篇文章既. 蘋果, 我真係無睇好耐啦~)
蛋治,
我唔覺得eason 呻佢自己啦…
我都話, eason 在講音樂人, 唔係講藝人咯….
同埋, 下次唔好睇d 唔睇d 就留言, 搞到我又要再解一次畫, 又唔知點解你要咁講, 好費勁…
對唔住啊. 我聽完Eason既說話, 我理解左係指所有同音樂創作有關既人. (包括佢)
真係唔好意思. 令妳咁煩惱.
查實呢個同何民傑o既經濟觀有關。佢係支持新古典(或者新自由)經濟學說o既,大抵係乜呢,之於勞動市場,少o的政府干預,同埋個體同個體按競爭力傾條件,就正喇。不過港風新古典派就唔多似某幾家講經濟o既報刊同求職雜誌咁猛鼓吹個人增值,或者係取向唔同。
咁點帶到去工會呢?工會組織一大班同行同老細們傾條件,又說政府立法搞乜限制物限制(包括唔妥working poor朋友支持o既最低工資),犯晒忌,既係掂到何生o既經濟觀底線,又搞到市場唔多自由(即係會出事?)重唔係「錯」事?錯就帶到壞,咁就「好心做壞事」,佢話工會同黑社會冇分別,原因大抵如此,因為兩者都係「壞」人。
之不過,香港雖o係某新古典派經濟組織o既自由經濟體系排名入面,多年得第一,但本土部分fans仍唔多滿意,人心更不在話下,干預市場之論重有市場,又難怪何生趁陳奕迅提下工會o個陣,「撥亂反正」o既。明乎此,唔同意何生係一回事,叫佢道歉,難矣哉——除非工會低頭認錯,洗心革面,謙虛學習實踐「自由市場」之道啦。
班友中晒毒,近乎係迷信自由經濟。 😈
如果工會係黑社會,咁商會係咩﹖
每年出黎叫老闆唔好加咁多既顧主聯合會又係咩﹖
更何況,工會同自由經濟根本沒矛盾。只要那工會沒能力包起所有工人的話,就沒有壟斷優勢。
如果佢既論點成立,則保險、國防、甚至抽稅呢類「集合眾人力量」的做法,全部有違自由經濟,請全部取消。