「我屋企貼橫財就手揮春，唔代表我賭馬啦！」
呢句說話，聽落，係咪都好似幾有道理呢？

但係，當你知道，當呢句回應，係關於最近警方大舉掃黃，有唔少內地女士被無理拘捕，而o係長沙灣警署入面o既告示板，就貼o左「唔理堅定流、好或醜，總之殺到一個都不留」呢類標語，同掃黃行動剪報o既事；而講呢句說話o既人，竟然係香港警務督察協會主席廖潔明時，你仲會唔會覺得：
「我屋企貼橫財就手揮春，唔代表我賭馬啦！」
呢句說話講得有道理？

我睇見就真係火都o黎埋！

今日o既蘋果日報港聞，有呢一段新聞：
「唔理堅定流，殺到一個都不留」
紫藤批警署掃黃標語

節錄及回應如下：

香港警務督察協會主席廖潔明回應說，首先未能確定相片真偽，即使真的貼上有關字句，也只是內部傳閱，作鼓勵同袍之用。

阿廖生你咁講，即係警方鼓勵同袍「唔理堅定流、好或醜，總之殺到一個都不留」啦！

廖潔明認為有關標語不會影響警員執法水準，「我屋企貼橫財就手揮春，唔代表我賭馬啦！」

我都好希望，你呢句咁冇水準o既比喻，亦都唔會影響警員o既執法水準囉！

他（廖潔明）強調若發現警察濫權，可正式作出投訴。警察公共關係科發言人說，警署內的壁報板主要用作內部溝通，向員工傳遞最新內部資訊。

嘩！咁警方即係承認「唔理堅定流、好或醜，總之殺到一個都不留」係向警員傳遞o既“最新內部資訊”囉？
咁，就算唔係一個“命令”，都算係一個“指引”喇o番？
　
　

香港旅遊發展局，麻煩你o地配合一下警方，提醒一下內地到港旅遊o既女士，千祈唔好踏足長沙灣區，如果唔係，就好易俾差人「唔理堅定流、好或醜，總之殺到一個都不留」啦！

唔通，長沙灣警署，想繼《域多利監獄》之後，成為第二個警方o既旅遊景點？

Comments

comments